Bänkk

---2012---

Di ganzi Technik isch kabutt gsi im Engi Sau
Nach däm riese Fädärä Skandau
Äs muess ja nid aus wiä früecher si
Aber dr Bläsi isch üs lieber gsi

Vermisst öpper vo Euch diä hundert Stei
Kei klari Antwort isch es nei
Wäm chönnte mir äch dä Lappe gä
Dr Zuppiger würd dä sicher nä

Dr Toni Rominger, dä het's schwär
Z'Bett dihei isch meischtens läär
Isch bir Francine Jordi nur no Gascht
Die jodlet jetze ufem Ascht

18i isch dr nöi Schnösu vom Epiney
Är wott uf Wäutreis mit sire nöiä Fee
Dr Sven wott nur – är isch gar kei Feigä
Am Chliine di grossi Wäut ga zeigä

D’Stadtpolizistin Tamara jessesnei
Züglet wäg - het gnue vor Polizei
suecht öpper ä Wohnig – äs nöis dihei
dr Häxeturm dä wird jetz frei

Nachem Hilari macht dr Höchner Stress
Redt vo Vandalismus ir ganze Press
I weiss nid was si dir für Medis hei gä
Vo denä söttsch chli weniger nä

Mini Frou dihei, i liäbä sä fescht
I tue aues teile – si isch di bescht
Nur bim Bankkonto gits Widerstand
I heisse doch nid Hildebrand

Dr Sepp Blatter alias Gottes Sohn
Macht was är wott und Korruption
Dr einzig Unterschied zwüschem Blatter und Gott
Isch dass Gott – nid dr Blatter si wott

Dr Doktor Zuber bhouptet är sigi gar nid fies
55 Stutz fürne Putzfrou sig ä faire Pries
Är isch gar nid sone Lumpehung
Da gits Frouä diä verlangä meh pro Stung

Dr Roger de Weck aus nöiä Chef vor SRG
Macht ä super Job das cha jede gseh
Är isch ir Schwiiz dr einzig Ma
Wo SF1 u 2 glichzitig luege cha